Eko-skola -Għaxart ifkieren jinħelsu fil-baħar wara li ddewwew

Iktar minn 200 student ħadu sehem fil-ħelsien ta’ għaxart ifkieren fil-bajja tal-Ġnejna kmieni t-Tlieta filgħodu. Dawn l-istudenti, li qed jipparteċipaw fil-programmi ambjentali tan-Nature Trust (Malta) EkoSkola u Young Reporters for the Environment, kellhom ix-xorti jaraw dawn il-kreaturi mill-viċin u jagħtu sehemhom fil-ħelsien tagħhom.

Dawn il-fkieren kienu qed jiġu rrijabilitati fiċ-Ċentru ta’ San Luċjan wara li sajjieda, NGOs, il-Forzi Armati ta’ Malta jew nies oħra ġabuhom għax kienu midruba. Il-fkieren kienu taħt l-assistenza medika ta’ Dr Anthony Gruppetta u taħt il-ħarsien kontinwu ta’ Charles Sammut, membru tal-istaff taċ-Ċentru ta’ San Luċjan. Voluntiera min-Nature Trust (Malta) jgħinu lis-sur Sammut fuq bażi regolari billi jdewwuhom, inaddfulhom u jitimgħuhom. Ħamsa minn dawn il-fkieren ġew salvati mill-Forzi Armati ta’ Malta – Sezzjoni Marittima - li jagħtu l-għajnuna tagħhom meta dawn il-fkieren ikollhom bżonn l-għajnuna fil-baħar.

Dr Gruppetta, direttur ta’ General Fisheries, kellem lill-folla mdaqqsa ta’ tfal u adulti li kienu fuq ix-xwiek biex jassistu għall-ħelsien tal-fkieren. “Illum ħlisna għaxart ifkieren oħra fl-abitat naturali tagħhom. Din is-sena ħlisna 21 fekruna,” qal Dr Gruppetta. “Kienet okkażjoni rari u speċjali għalikom għax inħelsu l-iżgħar u l-ikbar fekruna li qatt kellna fdati f’idejna minn meta bdejna dan il-programm ta’ rijabilitazzjoni,” issokta Dr Gruppetta.

L-iżgħar fekruna kienet tiżen biss 1.55 kilogramm. Min-naħa l-oħra, Spartacus, l-ikbar fekruna maskili, kienet tiżen 54 kilogramma u kellhom iġorruha 4 min-nies! Il-fekruna ilha San Lucjan minn Awwissu tas-sena 2008 u kellha bżonn 14-il xahar ta’ kura biex terġa’ tiġi fi stat tajjeb li tgħix għal rasha. Princess ilha taħt kura għal din l-aħħar sena waqt li Poseidon kellu bżonn 11-il xahar ta’ kura. Is-seba’ fkieren l-oħra ma kellhomx kumplikazzjonijiet serji u setgħu jinħelsu wara biss 3 xhur ta’ kura.

Sfortunatament mhux kull fekruna jkollha storja pożittiva. Ħafna jinqabdu fi xbieki tas-sajd mormija fil-baħar, jibilgħu boroż tal-plastik u affarijiet oħra u jaħbtu ma’ inġenji tal-baħar. Għaldaqstant ikollhom bżonn iktar kura u attenzjoni. Ftit mill-fkieren meħlusa dis-sena ġew operati biex jitneħħewlhom snanar u nylon mis-sistema diġestiva tagħhom.

Il-MEPA tixtieq tfakkar lill-pubbliku li min jara jew jiġi f’kuntatt ma’ fkieren midruba jista’ jċempel 2069 9595. Dan is-servizz ta’ emerġenza hu miftuħ 24 siegħa kuljum, 7 ijiem fil-ġimgħa.
Fost ħafna entużjażmu, żewġ studenti minn kull skola preżenti ħelsu fekruna sakemm inħelsu l-għaxra li huma. Mill-iskola taghna intghazlu Nathanael Sacco, Kyle Dalli, Leanne Said u Neil Zerafa. Il-fkieren li helsu dawn it-tfal kien jisimhom Bill u Palomita. Nawgurawlhom il-vjaġġ it-tajjeb lura fl-abitat naturali tagħhom!